* महाराष्ट्राला पहिल्या महिला उपमुख्यमंत्र्यांचा मान ; लोकभवन येथे साधेपणात शपथविधी
मुंबई / मानसी कांबळे :- महाराष्ट्राच्या राजकीय इतिहासात एक महत्त्वाचा अध्याय जोडला गेला असून सुनेत्रा अजित पवार यांनी आज शुक्रवार, 31 जानेवारी 2026 रोजी उपमुख्यमंत्रीपदाची शपथ घेतली. त्यांच्या रुपाने महाराष्ट्राला पहिल्या महिला उपमुख्यमंत्री मिळाल्या आहेत. दिवंगत उपमुख्यमंत्री अजितदादा पवार यांच्या निधनानंतर निर्माण झालेली राजकीय पोकळी भरून काढण्यासाठी हा निर्णय घेण्यात आला आहे.
मुंबईतील लोकभवन येथे पार पडलेल्या शपथविधी सोहळ्यात राज्यपाल आचार्य देवव्रत यांनी सुनेत्रा पवार यांना गोपनीयतेची शपथ दिली. यावेळी मुख्यमंत्री देवेंद्र फडणवीस, उपमुख्यमंत्री एकनाथ शिंदे, राष्ट्रवादी काँग्रेसचे वरिष्ठ नेते, मंत्री, आमदार व पदाधिकारी उपस्थित होते. शपथविधी सोहळा दुःखाच्या छायेत अत्यंत साधेपणाने पार पडला. समर्थकांना फुले, पुष्पगुच्छ न आणण्याच्या सूचना देण्यात आल्या होत्या.
अजितदादांच्या कार्याचा वारसा पुढे नेण्याची जबाबदारी
सुनेत्रा पवार यांच्या शपथविधीने दिवंगत अजितदादा पवार यांच्या जनसमर्पित कार्याचा वारसा पुढे सुरू राहील, अशी भावना राष्ट्रवादी काँग्रेस व महायुतीतील नेत्यांकडून व्यक्त करण्यात येत आहे. अजितदादांच्या दूरदृष्टी, निर्भीड निर्णयक्षमता आणि लोककेंद्रित राजकारणाची परंपरा सुनेत्रा पवार समर्थपणे पुढे नेतील, असा विश्वास व्यक्त केला जात आहे.
* राष्ट्रवादी काँग्रेसमध्ये नेतृत्वाचा निर्णय :- अजित पवार यांच्या अपघाती निधनानंतर राष्ट्रवादी काँग्रेसमध्ये नेतृत्वाबाबत चर्चा सुरू होत्या. पक्षाला एकसंध ठेवण्यासाठी आणि सरकारमधील राष्ट्रवादीची भूमिका मजबूत रहावी यासाठी सुनेत्रा पवार यांनी उपमुख्यमंत्रिपद स्विकारावे, अशी मागणी पक्षातील वरिष्ठ नेत्यांकडून होत होती. अखेर पक्ष नेतृत्व व महायुतीतील नेत्यांशी चर्चा करून त्यांनी हा निर्णय स्विकारल्याचे सांगितले जात आहे.
* अर्थखात्यावरही चर्चा :- दिवंगत अजित पवार यांच्याकडे असलेले अर्थ खाते, क्रीडा व राज्य उत्पादन शुल्क खाते पुढे कोणाकडे जाणार, यावर राजकीय वर्तुळात चर्चा सुरू आहे. राष्ट्रवादी काँग्रेसकडून अर्थ खाते आपल्या ताब्यातच ठेवण्यासाठी प्रयत्न सुरू असल्याची माहिती सूत्रांकडून मिळत आहे. याबाबत राष्ट्रवादीचे नेते प्रफुल पटेल आणि प्रदेशाध्यक्ष सुनील तटकरे यांच्यात बंद दाराआड चर्चा झाल्याचेही समजते.
* पंतप्रधान नरेंद्र मोदींकडून शुभेच्छा :- पंतप्रधान नरेंद्र मोदी यांनी सोशल मीडिया प्लॅटफॉर्म ‘एक्स’वर पोस्ट करीत सुनेत्रा पवार यांना शुभेच्छा दिल्या आहेत. त्यांनी म्हटले आहे की, महाराष्ट्राच्या पहिल्या महिला उपमुख्यमंत्री म्हणून कार्यकाळ सुरू करणाऱ्या सुनेत्रा पवार जी यांना शुभेच्छा. मला विश्वास आहे की त्या राज्यातील जनतेच्या कल्याणासाठी अथक परिश्रम करतील आणि दिवंगत अजितदादा पवार यांचे स्वप्न पुढे नेतील.
* आमदार रोहित पवार यांची प्रतिक्रिया :- राष्ट्रवादी काँग्रेस (शरद पवार गट) चे आमदार रोहित पवार यांनीही सोशल मीडियावर प्रतिक्रिया देत, राज्याच्या पहिल्या महिला उपमुख्यमंत्री म्हणून सुनेत्राकाकी यांनी शपथ घेतली, याचा आनंद आहे. अजितदादांची जागा कुणीच घेऊ शकत नाही, पण किमान सुनेत्राकाकींच्या रुपात तरी आम्ही तिथे अजितदादांना पाहू, अशी भावना व्यक्त केली.
* खंबीर नेतृत्वाची अपेक्षा :- सुनेत्रा पवार या खंबीर वृत्तीच्या नेत्या म्हणून ओळखल्या जातात. बारामती मतदारसंघातील सामाजिक, शैक्षणिक व सहकारी संस्थांमधील त्यांचा अनुभव, तसेच पवार कुटुंबाचा राजकीय वारसा लक्षात घेता, आगामी काळात पक्ष संघटन मजबूत करणे आणि सरकारमध्ये प्रभावी भूमिका बजावणे हे मोठे आव्हान त्यांच्यासमोर असणार आहे.
दुःखाच्या पार्श्वभूमीवर घेतलेली ही शपथ महाराष्ट्राच्या राजकारणात एक नवे पर्व ठरणार असून राज्यातील जनतेच्या नजरा आता सुनेत्रा पवार यांच्या नेतृत्वाकडे लागल्या आहेत.
